DISCOS PORNO: Festa PRENOM

En 1849 tivo lugar en Nova York o motín do Astor Palace. Foi un enfrontamento entre a policía e unha multitude pequenoburguesa que protestaba contra un actor shakespeariano que se chamaba MacReady. Este fixera unha boa un par de anos antes, porque Edwin Forest, un actor americano moi famoso (e moi querido) fixera unha xira por Inglaterra e MacReady púxoo a caer dun burro porque dicía que se tomaba moitas liberdades con Shakespeare para poñelo ao alcance das masas. MacReady era un snob e Forest un populista. No motín do Astor Palace houbo 31 mortos e 150 feridos.

Ás veces parece que a violencia mola porque nunca pasa nada, pero non é así. Imaxinádesvos que eses 31 mortos e 150 feridos fosen todos amigos? Serían 181 persoas que se apoiarían cos seus problemas sentimentais ou de saúde ou de diñeiro, e poderían facer unha festa fantástica con música en directo (daquela non había gravacións) e bailes do século XIX.

Cen persoas arriba ou abaixo, este será o caso que nos ocupa o VENRES 10 de OUTUBRO en EL PUEBLO, por uns ridículos 5 euros. Será unha FESTA PRENOM. Que implica isto?

PRENOM fan cousas con luces e cores como deseños e videoclips, e agora tamén sacan discos e montan festas porque teñen moitos amigos. Concretamente neste caso veñen tocar

CHICHARRÓN, que fan unha música preciosa que sona sabia. As letras e as músicas parecen ás veces fráxiles pero porque teñen dor e a dor fai dano, pero tamén hai amor e beleza e se prestas atención chegas ao final coa sensación de ter aprendido algo. Acaban de sacar o seu primeiro disco pero os seus membros veñen de outras aventuras como Franc3s, Telephones Rouges, Cudevaso ou Lowcost.

ATAQUE ESCAMPE, que son fantásticos nas súas contradicións. É difícil saber se van completamente en serio ou completamente en broma, porque dalgunha maneira conseguiron que nas súas cancións colla todo: dende Brasil ata o restaurante chinés de cabeceira (en Ourense está ben o Gran Pekín), dende Rosalía de Castro ata Daniel Craig, pop, cumbia, calipso, dub, soul e o que se vos ocorra. Entre a honestidade e o simulacro, din. Presentan o seu último traballo, “O disco vermello”.

Antes de empezar os concertos, haberá outras cousas:

Ás 20:00, Mar Catarina inaugura a súa exposición “A LAGOA”, na LIBRERÍA EIXO. Isto é DE BALDE.
Ao comezar a Festa, poñerán algúns dos seus videoclips. Non se sabe cales, pero teñen feito clásicos para os propios Ataque Escampe, Franc3s, Unicornibot, Mullet, Novedades Carminha ou Sr. Anido.

Despois dos concertos, haberá pinchadiscos para que no pare la cosa. Estes serán KARORI e AMANECER DORADO (isto é un Dj set, que non sabemos moi ben o que é). Poñerán música de baile de todos os séculos e cando todo acabe estaremos de por vida apoiándonos nos nosos problemas sentimentais, de saúde e de diñeiro.